ألقى رئيس بلدية زحلة – معلقة وتعنايل أسعد زغيب كلمة لمناسبة مهرجان الشعر التقليدي الذي ينظم من ضمن مهرجانات الكرمة سنويا، حملها الكثير من الرسائل حول القيم والمبادئ التي تميز مدينتنا، وتحدد دورها بالنسبة للمحيط ولبنان عموما، مطلقا المبادرة أيضا لإكتشاف مواهب اولادنا الشعرية، وتنمية قدراتهم الفكرية والادبية، حفاظا على شعار “زحلة عاصمة للادب والشعر”.
فيما يلي كلمة زغيب كاملة كما ألقاها باللهجة العامية:
بداية بحب نوقف كلنا سوا دقيقة صمت على ارواح ضحايا انفجار المرفأ يلي ارتفعوا ابطال عالسما ، وصاروا ملائكة ،
منطلب منهون اليوم وكل يوم يساعدونا ويصلوا معنا ت يرجع لبنان وطن الامن والسلام.
من بعد ازمة كورونا رجعنا نلتقي،
وما في اجمل من اللقاء مع ارباب الكلمة، مع الشعراء والمفكرين والادباء ،
وكيف اذا كان هيدا اللقاء بالقصر البلدي.
زحلة نبع القوافي الحالمة …
زحلة الأم يلي بتضم ع صدرها كل اولادها،
زحلة يلي كتبت تاريخها من دون جميلة حدا،
هيي هيي من فجر التكوين،
مدينة القيم والمبادئ ،
مدينة الشعر والخمر ،
لا بتتلون ولا بتتبدل،
ولا بتمشي بعكس التاريخ ….
زحلة هيي الحضارة يلي طبعت هالكون بقيم كتار بيحلمو فيها،
هيي نبع الاخلاق والشهامة،
نبع القوافي المتناغمي مع بعضها،
القوافي يلي بتلاقي بعضها بكل آخر سطر، وبتاخدنا ع سطر جديد …
وهيك اهل زحلة ،
هني قوافي قصيدة بلشت وما بتخلص، بتتجدد مع كل سطر جديد،
وبتخلق قصة جديدة …
اهل زحلة وعلى مر التاريخ ،
دائما بيتلاقو وبيتوحدو،
وببشرو بولادة جديدة،
اهل زحلة بيتناغمو مع كل محيطون،
بإيام الخير وايام القسى،
بكل الاوقات، هموّن مصلحة هالوطن.
ونحنا ببلدية زحلة وانطلاقا من ايمانا بهيدا الشي، عم نجهد ليل نهار لتأمين استمرارية العمل لخدمة المواطن …
انطلاقا من شعار اطلقناه مع بداية ولايتنا
وهوي “زحلة الحلم” !!!
زحلة حلم عم يتجدد مع كل مغيب،
وبيتحقق مع كل شرقة شمس،
وطالما فينا نبض،
طالما رح نضل نحلم،
ورح يضل تحقيق احلامنا هوي الهدف، هدف انو تصير زحلة مدينة ع قد طموحاتنا واكتر …
رغم كل الصعاب ، ورغم كل المخاطر،
رح نضل نسعى ونحارب لجعل هالمدينة رائدة بمحيطها ومميزة ع صعيد الوطن.
نحنا اللبنانيين يلي بيجمعنا اكبر بكتير من يلي بفرقنا،
نحنا بتجمعنا عادات وتقاليد ،
بتجمعنا قيم ومبادئ مشتركة ،
متل احترام الغير،
اسلوب التعاطي مع الآخر ،
مساعدة بعضنا، وحب الوطن ، …
انطلاقا من هالكلام لازم نركز اهتمامنا
على كيف نكرس يلي بيجمعنا ويكون الاساس بتربية الاجيال القادمة،
لازم نبلش سوا بتجديد كتاب التربية المدنية، الكتاب يلي رح يحمل بين صفحاتو اسلوب حياة جديدة ،
بتجمع وما بتفرّق،
كتاب من خلالو فينا نعلم اولادنا كيف يتفاعلو مع بعض ويحافظو على عاداتنا وتقاليدنا،
على قيمنا ومبادئنا يلي هيي اساس بناء المجتمع،
وبناء الانسان بهالمجتمع.
يوم يلي كلنا منصير نقرا بنفس الكتاب، بتصير كل المفاهيم اوضح،
وبصير الواقع اقرب ل وطن الاحلام،
الاحلام اللي بتتحقق …
يوم يلي منلتقي كلنا،
ومنحافظ ع القيم العائلية،
ومنركز على روحية الانفتاح نحو الجميع، ومننشر العلم والمعرفة،
منكون فعلا عم نكرس مفهوم وطن الرسالة.
يوم يلي منربي ولادنا متل ما اهلنا ربونا، ومنخلق عندون روح الابداع،
ومنشجعون يطمحو نحو الجودة والتنافس الحضاري منكون عم نساعد بخلق وطن بيليق فينا وبتاريخنا.
كلنا شركاء على مستوى العلم والثقافة والإيمان،
وواجب علينا النهوض بوطننا،
نحنا كلنا شركاء بالتأسيس لوطن، بيتساوى فيه القوي والضعيف ، الفقير والغني ،
اللبناني من يوم يلي خلق وهوي بكافح وبيسعى ت يعيش بكرامة ،
يعيش بوطن قائم على المساواة والعدالة بين جميع اولادو.
زحلة مدينة الأدب والشعر
هيدا اللقب ما اجا من عدم
هيدا حمل كبير بحجم العظمة
والمحافظة عليه مسؤولية كبيرة كتير.
سنة 2016 عملت تقييم ذاتي ل 13 سنة من العمل على برنامج اطلقناه لتشجيع :
– كتابة القصة الصغيرة
– كتابة الشعر باللغة العامية
– كتابة الشعر بالفصحى
ومن بعد ما عملنا تقييم للسنوات يلي اشتغلنا فيها ع هيدا الموضوع
وصلنا لنتيجة ما كانت ع قد الآمال والطموحات …
النتيجة ما كانت متل ما بدنا،
وما بتخلينا نضل نتغنا بزحلة مدينة الشعر والثقافة،
وكرمال هيك اليوم رح اغتنم هالمناسبة
واطلب من مجلس قضاء زحلة الثقافي
وكل شخص بيعتبر حالو معني بهالموضوع
يشاركنا بوضع خطة عمل لتشجيع وتنمية كتابة الشعر ب زحلة،
وانا شخصيا وكل اعضاء المجلس البلدي
منوضع انفسنا بتصرف الكل،
ت نخلق جو ادبي ونوضع خارطة طريق نقدر من خلالها نحافظ سوا ع زحلة عاصمة الادب والشعر ،
لازم نوضع خطة لنحافظ على استمرارية الابداع الشعري
يلي بلش مع شعرائنا وادبائنا الكبار يلي كتبو مجد زحلة،
وانا اكيد انو سوا رح فينا نرجع،
ايد ب ايد نوضع خطة جديدة
ونكتشف من خلالها مواهب اولادنا الشعرية،
وننمي عندهون القدرات الفكرية والادبية،
هيدي مبادرة رح نطلقها اليوم من القصر البلدي وبمهرجان الشعر ونشتغل سوا لتحقيقها.
عشتم عاشت زحلة مدينة الشعر والادب
وعاش لبنان
