صدر عن “الكتلة الشعبية” بيانًا جاء فيه: “بمرحلة التحضير للانتخابات يبدو كل شي مباح وعلى رأس الاسلحة التقليدية هوي خداع الناس، والمعركة ماشية ع إدعاء إنجازات ووعود جايي تخلّصنا من الجحيم”.
وأضاف، “بينما الناس بيكفيها الي فيه، مش ناطرين معجزة وكل أملهن حدا يصدق معهن وما ينظر الهن على صورة استثمار انتخابي لأنو اهل زحلة والبقاع عندن من العنفوان كنز بيوزع فيه حواصل ع العايزين”.
وتابع البيان، “يلّي بيشوف شعارات انتخابات العام 2018 من بعيد رح يتوّهم انو زحلة بال 2022 صارت جنة المدن. بنفهم انو المرشحين ومن ضمنهن نواب حاليين حبّوا يصطنعوا عدو للمعركة بس بنترجاهن انو يحترموا قدرة اهلنا الكرام على التمييز وقراءة الواقع”.
واعتبر أن “الواقع بيقول انو الاستعراضيين اليوم هني الي اختبرنا وجودهن مبارح وعدم قدرتهن على انجاز احلام الناس البسيطة”.
وأضاف، “يمكن ع شوية كنّا رح نسمع من بعض الاحزاب الكبيرة عبارة “ما خلّونا” يعني متلكن متل غيركن .. وطواحينكن بالهواء اليوم كمان “ما رح تقطع معنا”.
وتابع، “فيكن توهموا الناس بعض الوقت بس ما فيكن تكذبوا عليهن كل الوقت , او تتبرأوا من السلطة لانكن شركاء فيها وأسستوا لأكبر كذبة بالتاريخ اللبناني الحديث مغلّفة “بالتفاهم”، وللأسف كلنا صدقناكن يومها وبنينا ع هالتفاهم شراكة مجتمع مسيحي موحد”.
وأشار البيان، الى أن “هالشراكة انفرط عقدها مش لاسباب عقائدية بل لدوافع تحاصصية على المراكز المسيحية، وهيدا بيعني انو قطبين مسيحيين كبار كذبوا عالناس وغشوهن باحلام وبنود مزينة باغنيات وحب من خي لخيو”.
وسأل، “هيدا شو بتسموه”؟، مضيفًا: “وإذا بدكن نحكي عن الانجازات الوهمية بالمشاريع ما بنخلص بس بدي اتوقف عند مشروع واحد منها وهوي “البناء الجامعي الموحد” للجامعة اللبنانية بالبقاع”.
وأردف، “شي مرة اعترفوا للناس بالحقيقة وخبروهن انو هالانجاز مش من صناعتكن وانو الارض قدمها آل سكاف، والحكومات المتعاقبة صارت تماطل بالتنفيذ”.
وختم البيان، “ورح نخبر الرأي العام بزحلة وبالبقاع قريبا ًمين الي عرقل وليش المماطلة ومين الي نسب زورا ًهالانجاز لحقبة نيابتو. بدكن الناس تنتخبكن ؟ .. وقفوا كذب عليهن , وخففوا بيع احلام ومصادرة تاريخ”.